-
Moun ka pôté chaj
Tini moun ka poté chaj asi chaj
Tout lasentsimen san katchilé
Kon fôsa dépi soley lévé
Jiktan lannwit rivé
Pas sé konsa, sé konsa, sé lavi
Fôw alé, fô alé, fo paw tchilé
Tini moun ka chèché chaj
Yo pa pou chèché
Tini moun ka pôté chaj
Yo pa pou pôté
Ou sé di moun brak, moun fou
Moun Ki élijé épi kô ayo
Moun ka pôté
Chaj a trèt a kaz, Chaj a trèt a loto,
Chaj a bèf a lanmwatyé, chaj a tè a lérityé
Chaj a fanm konkibin, chaj a moun mô
Chaj a moun ka baw lokipasyon
Chaj a moun ka baw bouton
Chaj a tout kalté dyab é sékon ka baw landômi
Ka maréw anba lopsyon la sijésyon
-----------------------------------------------------------------------------------------
Chaj !
Tini moun ka poté chaj
a radsal yo ka trenen dépi nanni nannan
San sav pouki
Chaj a cha kan é bannan
Ka pézé asi tèt a plizyè jénérasyon a nèg
Yo baké dépi sis syèk
Adan kal a bato négriyé
E ki travèsé lorizon é lanmè blé-la.
Tini moun ka pôté chaj
Asi chaj pou on zig pen
Moun ka kouri lévé douvan jou
Pou baré lanmizè
Moun ki koriach, moun ki solid,
Douvan léternel
Tini moun ka chayé bwa,
ka chayé dlo
ka chayé rôch épi siman épi parpen
Pou fè bèl kaz , bèl vila, bèl chato
Ba moun ka sousé san a péyi-la
Moun ki agoulougranfal
Ka valé tout richès a péyi-la
Moun ki isidan menm ka alyansé épi moun vini,
Moun andéwô menm bèt, menm pwèl,
On ban moun madragè,
On ban vôlè, profitè, malfétè!
Ki la pou fantchou a moun
Avan menm yo sôti
An bouden a manman yo
Tini moun ka poté chaj ayo
Konsi sé on chimendkwa
chaj a timoun a yo,
Chaj a fanmi a yo,
Yo kalé san fébli
épi konfyans, épi pasyans
Epi lapriyè lespwa ki on jou sa ké chanjé
Yo kalé Amen mèsi Bondyé !
Mèsi Bondyé, Amen !
Epi lespwa ki on jou sa ké chanjé !
Men sa ki bèl an ba labay !
Tini moun ka poté chaj a dot moun
Anplis di chaj a yo
Moun ka poté chaj ki tro fo ba yo
Men mèsi Bondyé ! Mèsi !
Twa fwa mèsi Bondyé
Oben padon Bondyé !
Twa fwa padon Bondyé !
pask
Tini moun ki pa ka poté pon chaj
Moun ki fyè kon grangrèk koumandè
Moun ka rifizé poté pon kalité chaj
Ki ba manman, ki ba papa
Moun ki paka mandé w kaw ka van
E ka travèsé savan lavi tou mansousyan
Kon zétwal filant ka filé o firmaman
E Tini moun ka poté chaj
Ki léjè, flègèdè, flo, flo,
Kon plim a zosyo
Moun ki chanslé adan lavi
Men tini on dôt kalité moun
Moun kini chaj a yo ki ta yo
E ki an menmditan
Ka travay pou soulajé
Moun ki ja ni chaj a yo ki ta yo
Moun ki filozof douvan lavi
Moun ki vlé mofwazé lavi
Moun kini lasyans
Moun ki atout
Adan zafè ayo
Moun ki pa ka pôté chaj
Jis pou pôté chaj
Moun ki vlé ba lavi
On dot balan, on koulè ki nèf,
Méyè, otantik
On santiman ki toupré lanmou
Oben ki sé lanmou menm
Pawol la ka di :
« Tout chaj sé chaj
E sé dèyè chaj kini chaj »
Men tini on dôt pawôl ka di :
Fôw déchajé kô aw
Dégajé lespiw aw
Pou fè douvan
Jété sa ki mové
Pou alé pi lwen.
Pawôl la di, pawôl la maké
Men sé viv li ki tout !
Mèsi anlo, mèsi on chay !
José ROBELOT
Jôdi 1 novanmb 2013
-
Commentaires